Flugnafælur – fyrsta varnarlínan gegn biti
Flugnafælur (e. repellent) fæla skordýr frá húðinni og draga þannig úr líkum á biti. Þær drepa ekki skordýrin heldur gera þau síður líkleg til að nálgast okkur.
Flugnafælur og meðferð við bitum
Sumarið er tími útiveru, ferðalaga og samveru í náttúrunni. Með hlýrra veðri eykst hins vegar virkni ýmissa skordýra eins og lúsmýs, mýflugna, moskítóflugna og mítla. Bit geta valdið kláða, roða og óþægindum, en með réttum vörnum og góðri umhirðu er hægt að njóta sumarsins án óþægilegra aukaverkana.
Í hvaða formum eru flugnafælur fáanlegar?
Flugnafælur eru til í mismunandi formum og henta því ólíkum aðstæðum og þörfum.
- Sprey: Vinsælasta formið vegna þess hve auðvelt er að bera það fljótt og jafnt á stærri húðsvæði og jafnvel á fatnað.
- Roll-on og gel: Henta vel fyrir nákvæma ásetningu á minni svæði eða viðkvæm svæði líkamans, til dæmis andlit.
- Krem og húðmjólk: Veita oft aukinn raka og geta hentað sérstaklega vel fyrir viðkvæma húð.
- Armbönd, plástrar og rafrænir fælar: Virkni þeirra er oft umdeild og þau eru frekar talin viðbót en aðalvörn.
Hvaða flugnafælu á að velja?
Flugnafælur innihalda mismunandi virk efni og henta því mismunandi aðstæðum.
DEET
- Ein áhrifaríkasta og mest rannsakaða flugnafælan.
- Veitir langvarandi vörn gegn lúsmýi, moskítóflugum og öðrum bitflugum.
- Hentar sérstaklega vel við mikla skordýraágang eða ferðalög erlendis.
- Hærri styrkur gefur yfirleitt lengri vernd, en ekki endilega meiri fælingarmátt.
- Vara: Mygga
Icaridin (Picaridin)
- Áhrifarík vörn sem er oft talin mildari fyrir húðina.
- Fitukennd tilfinning er minni en með DEET.
- Hentar vel fyrir alla fjölskylduna.
- Vara: Smidge, Moustidose rauður
Náttúrulegar flugnafælur
- Innihalda plöntuolíur eins og sítrónu-júkalyptus, citronellu eða lavender.
- Henta þeim sem kjósa náttúruleg innihaldsefni.
- Þurfa yfirleitt tíðari ásetningu þar sem verkunartíminn er styttri.
- Effitan, Moustidose grænn, Now Bug Ban spray
Ráð til að ná sem bestri virkni
- Fylgdu alltaf leiðbeiningum framleiðanda.
- Berðu flugnafælu á alla óhulta húð.
- Forðastu augu og munn.
- Ef þú notar sólarvörn skaltu bera hana á fyrst og leyfa henni að draga sig inn áður en flugnafælan er sett á.
- Eftir sund, mikla svitamyndun eða langa útiveru þarf oft að bera flugnafæluna á aftur.
Flugnafælur fyrir börn
Veldu vörur sem henta aldri barnsins og fylgdu aldurstakmörkunum framleiðanda.
- Hjá litlum börnum skal ekki nota flugnafælur með háum styrk DEET.
- Berðu flugnafæluna fyrst á þínar hendur og nuddaðu henni síðan varlega á húð barnsins.
- Forðastu lófa, þar sem börn setja þá oft upp í munninn.
- Forðastu andlit barnsins.
- Ungbörnum undir 6 mánaða aldri er ekki mælt með notkun flugnafæla. Fyrir þau er best að treysta á líkamlega vörn, svo sem:
- Moskítónet
- Léttan langermabol
- Langar buxur
Hvað á að gera ef þú færð skordýrabit?
Þrátt fyrir góðar varnir getur skordýrabit stundum komið fyrir. Flest bit eru saklaus og lagast af sjálfu sér á nokkrum dögum.
Fyrsta hjálp
- Hreinsaðu bitstaðinn með vatni og mildri sápu.
- Kældu svæðið með köldum bakstri eða íspoka.
- Forðastu að klóra bitið þar sem það getur aukið kláða og valdið sýkingu.
Hvernig má draga úr kláða og bólgu?
Ýmsar vörur geta hjálpað til við að róa húðina eftir bit og draga úr kláða, roða og bólgu.
Lausasöluvörur sem geta hjálpað
- Kælandi gel og krem: Innihalda oft mentól, kamfóru eða aloe vera sem kæla húðina og draga úr kláða.
- Rakagefandi og græðandi krem með panthenóli: Styðja við endurnýjun húðarinnar.
- Náttúrulegar vörur: Tea tree olía eða lavender geta haft róandi áhrif.
- Sérhæfðar vörur eftir bit:
- Chicco NATURALZ After-bite plástrar/límmiðar með skemmtilegum myndum sem róa húðina eftir bit.
- Moustidose Soothing Care Cream – krem sem nota skal til að draga úr kláða og eymslum eftir bit. Virka innihaldsefnið er Boswellia serrata extract, sem kælir og dregur úr kláða.
- After-Bite penni – penni sem notaður er á skordýrabit til að draga úr óþægindum og flýta fyrir bata.
- Beurer kláðabaninn – mýbitsbani sem hjálpar við að draga úr kláða og bólgum á bitum.
- Mildison Lipid kremið – inniheldur hýdrókortisón, sem er vægur steri.
- Xylocain – smyrsli eða gel með deyfandi áhrifum.
- Ofnæmislyf – geta hjálpað við miklum kláða eða bólgu:
Lyfjafræðingar okkar geta hjálpað þér að velja réttu vöruna fyrir þig eða fjölskylduna.
Hvenær þarf að leita læknis?
Leitaðu tafarlaust læknisaðstoðar ef þú færð:
- Mikinn eða ört vaxandi bjúg
- Bólgu í andliti eða hálsi
- Andþyngsli
- Svima eða yfirliðstilfinningu
- Hjartsláttarónot
- Einkenni sem benda til alvarlegs ofnæmisviðbragðs
Njóttu sumarsins áhyggjulaust
Með réttri flugnafælu, góðri forvörn og einfaldri fyrstu hjálp er auðvelt að draga úr óþægindum vegna skordýrabita. Ef þú ert óviss um hvaða vara hentar best skaltu leita ráða hjá starfsfólki apóteksins.